Infórmate da nosa oferta para este curso lectivo. Propoñemos obradoiros e itinerarios para Educación Infantil (2º ciclo) e Educación Primaria, co obxectivo de normalizar a diversidade, mellorar a convivencia e previr condutas LGTBIfóbicas. Traballamos con metodoloxía lúdica, enfoque feminista e de dereitos, e adaptamos cada sesión á realidade do centro.

Que é?

É un programa educativo que achega, con linguaxe sinxela e actividades vivenciais, a diversidade afectivo-sexual, de xénero e familiar ás aulas. Axudamos a crear contornas seguras e respectuosas, onde todo o alumnado se sinta recoñecido.

Obxectivos

• Normalizar a diversidade e reforzar a convivencia respectuosa.
• Previr insultos, estereotipos e acoso por orientación, identidade ou expresión de xénero.
• Potenciar competencias socioemocionais: empatía, coidados, resolución pacífica de conflitos.
• Dotar de recursos ao profesorado e acompañar ás familias/ANPA.

A quen vai dirixido?

• Educación Infantil (2º ciclo) e Educación Primaria (1º–6º).
• Profesorado: formación e materiais para traballo de aula.
• Familias/ANPA: Escolas de Familias e sesións informativas.

Contidos e actividades

Infantil (2º ciclo)

• Familias diversas, emocións e coidados.
• O meu corpo é meu e límites seguros.
• Contacontos, xogo simbólico e dinámicas cooperativas.

Primaria

• Diversidade e igualdade. Estereotipos de xénero e linguaxe respectuosa.
• Prevención do bullying LGTBIfóbico e promoción do bo trato.
• Corresponsabilidade e uso responsable das redes/patio.

Profesorado e familias

• Conceptos clave (identidade, orientación, expresión, familias).
• Como actuar ante situacións cotiás e incidencias.
• Guía de recursos e materiais para continuar en aula e na casa.

Metodoloxía

Participativa e lúdica: xogo, contos, dinámicas cooperativas e role-play. Enfoque feminista, interseccional e de dereitos. Avaliación formativa ao remate de cada sesión para aterrar acordos e seguimentos co centro.

Formatos, duración e grupos

• Obradoiros por aula: 50–60’ (Infantil) · 60–90’ (Primaria).
• Formación de profesorado: 60–90’.
• Escolas de Familias: 60–90’.
• Grupos: aula completa (ideal ata 25–28 participantes).

Propoñemos tamén itinerarios por niveis (2–3 sesións por curso) e accións complementarias con claustro e ANPA.

Requisitos do centro

• Aula ou salón de actos; opcional: proxector/pantalla.
• Coordinación previa para axustar contidos, tempos e grupos.
• Entregamos ficha técnica por sesión e materiais para continuidade en aula.

Equipo

O plan é impartido por persoal especializado en educación e intervención social, cunha técnica de formación que coordina a adaptación ao centro e profesionais de apoio segundo a proposta.

Apoios e visibilidade institucional

Aplicamos as normas de comunicación pública cando corresponda (logotipos e textos obrigatorios das administracións financiadoras) e facilitamos os elementos gráficos para web e cartelería do centro.